Asteazkenean atera ziren kalera musika eskolako ikasleak, Santa Zeziliaren omenez herria musikaz bustitzera, eta emanaldi gehiago izango dira asteburuan.
‘Entzunigarria’, gaur
Batetik, gaur arratsaldeko 17:30etan Entzunigarria ipuin musikatuaz gozatzeko aukera izango dute haurrek, doan, musika eskolan.
Txistulariak, bihar
Txirriskla taldeko txistulariek, berriz, musika eskolakoek lagunduta, bihar 13:00ean joko dute, Joseba Barandiaran plazan. Kontzertu berezia prestatu dute, eta besteak beste, Astigarragako idiarena doinu herrikoia joko dute, aurrenekoz.
Txekiako zortzikotea, elizan
Asteburua borobiltzeko, Vocal Ensemble Gentlemen Singers, Txekiako zortzikotea entzuteko aukera izango da debalde, bihar 18:30etan, Andre Maria elizan. Talde ezagun honek dagoeneko 500 emanalditik gora eskaini ditu, 6 disko grabatu eta nazioarteko hainbat lehiaketa irabazi. Txekiako doinuez gain, pop-rock, gospel eta musika klasiko estiloko kantuak ere interpretatuko dituzte.