Emakumeenganako indarkeria mota guztiak gaitzetsi eta gizon eta emakumeen arteko berdintasunaren alde lan egitea ez da egun bakarrera mugatzen. Horregatik, atzoko Emakumeenganako Indarkeriaren Kontrako Egunaren harira, bestelako hainbat ekintza antolatu eta konpromisoak ere hartu dira herrian. Horietako bat da, mapa morea osatzea.
Herritarrekin saioak, datorren astean
Mapa morea osatzeko, Astigarragako kale, plaza eta espazio publikoak aztertu nahi dira herritarrekin batean, eta horretarako, euskeraz eta gaztelaniaz bina saio antolatu dira datorren astean; azaroaren 29 eta abenduaren 2an gaztelaniaz, 17:00etatik 18:30etara Galtzaur Jubilatuen etxean, eta azaroaren 30 eta abenduaren 1ean euskeraz, 18:30etatik 20:00etara udaletxeko Pleno Aretoan.
Saio hauen helburua izango da herritarrekin batean hirigintza berrikustea, emakumeen segurtasunaren ikuspegitik. Izan ere, espazioen antolaketak eragin haundia dauka bertan bizi direnen eguneroko bizitzan, eta Udaletik azaldu dutenez, «hirietako espazioen egituraketan lan ugalkorrari ez zaio kasurik egin, gizartearen biziraupenerako eta jasangarritasunerako ezinbestekoa den arren».
Hori horrela, herritarrekin egingo diren saio irekietan lau ardatz landuko dira: segurtasuna eta autonomia, mugikortasuna eta irisgarritasuna, emakumearen presentzia erreal eta sinbolikoa espazio publikoan, eta zaintza, lan ugalkorra eta eguneroko bizitzarako espazio eta ekipamendu publikoen sarea.
Mobilizazioak, A25ean
Atzoko egunaren harira bestelako ekintzak ere antolatu dira. Ostegunean, esaterako, kale animazioa izan zen, eta azken Plenoan, aho batez onartu zen adierazpen instituzionala; hemen webgunean ikusgai.