Institutuko eraikuntza berria egiteko obretan «langileen lan baldintza eta segurtasun neurriak ez direla errespetatzen» salatzeko kontzentrazioa egin zuen ELA sindikatuak atzo.
«Ezin dugu onartu horrela jarraitzea»
Ildo beretik, ELAk jakinarazi zuen: «Hernaniko BHI ikastetxe berriko eraikuntzan gaur egun dauden irregulartasunak oso larritzat jotzen ditugu, eta ezin dugu onartu horrela jarraitzea». Diotenez, «eraikuntza honetan lan egiten ari diren langile gehienei ez zaie aplikatzen Gipuzkoako eraikuntzako hitzarmenak adierazten duena». Ondorioz, «langile hauek hitzarmen honek esaten duena baino askoz gutxiago kobratzen dute, eta egiten dituzten gehiegizko lan orduak (larunbatak eta jai-eguna, barne), jasaten ari diren presioak, esplotazioak eta lan segurtasun faltak, konponbide azkar eta zehatz bat behar du».
Eusko Jaurlaritzak sustatuta
Eusko Jarlaritza da obra sustatu duen erakundea, eta beraz, esleipena egin duena. ELAk jakinarazi duenez, «modu tamalgarrian egin zen esleipena, eta beti bezala, eskaintza merkeenari eman zitzaion; Vías y Construcciones SA enpresari, 2’8 milioi euroren truke, hasierako aurrekontuaren oso azpitik. Horregatik, ez zen oso zaila imajinatzea ez zuela egungo legea behintzat beteko».
Alkateari, eskutitza
Horren aurrean, jakinda erantzukizuna Eusko Jaurlaritzarena dela, bilera baterako deia luzatu dio ELAk Udalari, Luis Intxauspe alkateari helarazitako gutunean: «denon artean pausuak eman behar ditugu horrelako arazo eta irregulartasunik gerta ez dadin, ez gure herrian, eta ez beste inon».