Azken asteotan Altsasun gertatutakoaren harira, gazteei babesa eta elkartasuna adierazteko, kontzentrazioa deitu du Hernaniko Sortuk gaurko. Alde hemendik, utzi Euskal Herria bakean lelopean, 19:30etan izango da, Plaza Berrin.
«Iraganeko garaiak»
Deialdiarekin batera, Altsasuko gertakarien balorazioa egin du Sortuk: «Altsasun gertatutakoak iraganeko garaiak dakarzkigu gogora: Estatutik orkestratutako herri baten kriminalizazioa, atxiloketak eta espetxeratzeak eta Audientzia Nazionala tartean sartu izana. Honi guztiari, herri eta gune ezberdinetan biderkatu diren maniobra militarrak eta Guardia Zibilaren presentziaren areagotzea gehitu behar zaio».
Hori kontuan hartuta, gertaerek bi helburu izan dituztela diote: batetik, «desmilitarizazioaren eta presoen etxeratzearen aldarrikapenak kriminalizatu eta ezintzea, horrela gatazkaren ondorioen betikotzea bilatuz eta gatazkaren irtenbide oso eta justurako aukera zuzenean erasotuz. Halaber, ETAren desarmea modu ordenatu eta egokian egitea ezinduz». Eta bestetik, «garaile eta garaituen errelatoan sakondu eta Guardia Zibilaren historia zuritzea». Horrekin guztiarekin, ez dute baztertzen «oldarraldi honek ekarri ditzakeen kriminalizazio eta errepresio saiakera berriak egon daitezkeenik ere».
Lau gako nagusi
Lau gako nagusi azpimarratu dituzte bake oso, justu eta iraunkorra emateko: «ETAren armagatze ordenatua eman behar da; euskal preso politikoek espetxetik atera behar dute, euskal jendarteak adosten duen modu eta denboretan; biktima guztien aitortza eman behar da eta egi osoaren ezagutza; eta Estatuko seguratun indarrek Euskal Herritik alde egin behar dute».