Ekonomia sozial eta eraldatzailearekin lotutako enpresen filosofia eta eskaintza gizarteratzeko asmoz, Alternaktiba azoka antolatu du Udalak, larunbat honetan; Atsegindegin izango da goizeko 11:00etatik 14:00etara. Eta hori aurkezteko, Gabriel Zelaian bildu dira Luis Intxauspe alkatea, Andoni Egia, Tokiko Garapenerako teknikaria, eta azokaren antolaketan parte hartu duten hainbat eragile eta enpresen ordezkariak.
Hiru helburu, azokak
Luis Intxauspe alkateak azaldu duenez, «azoka hau udaletxean lantzen ari garen ereduan kokatzen da». Eta ildo beretik, adierazi duenez, «bai Hernanin baita eskualdean ere, hainbat proiektu egin dira». Hain justu, Gabriel Zelaia zentroa da programa horien baitan sortu diren ekimen eta proiektuen sorburua.
Horregatik, 2014garren urtetik eskaini den ekintzailetza sozial eta kooperatiboaren zerbitzuaren bidez, bertan egin diren proiektuak «ikustaraztea» izango da azokaren helburuetako bat, baina ez bakarra.
Bigarren helburua, Andoni Egiak azaldu zuen bezala, «ikustarazi nahi da, badagoela beste eredu bat behar gehienak asetu ditzakeena: elikadura, energia, telekomunikazioak, finantzak...». Eta azkenik: «urtarriletik aurrera, Mondragon Unibertsitatea, Olatukoop eta Gipuzkoako hiru Garapen Agentziekin batera, eskainiko den Ekintzailetza Sozial eta Kooperatiboaren inguruko aurkezpena egin, informazioa eskaini eta bertan izena emateko aukera egongo da».
Hogei bat postu, Atsegindegin
Helburu horiekin elkartuko dira hogei bat eragile eta enpresa larunbat goizean, Atsegindegin; besteak beste,
Amher, Fiare, Arremanitz, Goiener, Kalaka, Bizi-On, Uztarri, Ximaur pila, TaPuntu...
Mikrofono aurrean haien proiektuen berri emateaz gain, bakoitzak bere postuan azalpen pertsonalizatuak emango ditu eta zalantzak ere argituko dituzte.
Gainera, azoka girotzeko, pintxoak eta bertako garagardo dastaketa ere izango dira.