Santa Zezilia eguna da gaur, musikaren eta poeten patroia omentzeko eguna, hain zuzen. Hori ospatzeko, hain zuzen, hainbat ekitaldi egiten ari dira herrian. Kontzertua eskaini zuten larunbatean Hernaniko Kantuz, Astigarragako Aiztondo, eta Orioko Salatxo abesbatzek, Errenazimenduko Musika Profanoaren inguruan. Eta aste honetako ekitaldiekin emango zaio jarraipena.
Hernani Musika Eskola Publikoko ikasleak musikaz zipriztinduko dute Biteriko areto nagusia, arratsaldeko 18:30etatik aurrera. Saxofoiak, trikitixa eta panderoak, biolinak, akordeoiak, perkusioa, txalaparta, pianoak eta ahotsak (bakarka eta abesbatza) eta talde instrumentala entzun ahal izango dira. Eta ondoren, diplomak banatuko dituzte 2garren eta 3garren maila bukatu duten ikasleei.
Akordeoiak, ostiralean
Emanaldiz emanaldi egongo dira Musika Eskola Publikoko ikasleak aste honetan, eta kontzertu haundiari akordeoi entzunaldiak hartuko dio lekukoa ostiralean. Milagrosako kaperan jarri dute datorren zita, iluntzeko 20:00etatik aurrera.
Herriko kaleetan barrena, larunbatean
Santa Zezilia eguna borobildu eta datorren urtera arte agurtzeko asmoz, larunbatean musikak eta dantzak egingo dute bat. Herriko kaleetan barrena, kalejiran ibiliko dira Hernani eta inguruko hainbat txistulari, bi tronpeta jole eta Ttarla dantza taldeko kideak. Musikari eta dantzariak, denak elkarrekin, erdigunetik barrena ibiliko dira, eguerdiko 12:30etatik aurrera, kaleak girotzen.