Martxan jartzear dago Agenda bateratua, Urumea bailarako ekitaldiak bilduko dituena. Agenda hori, elkarteek eurek elikatuko dute, eta bertan argitaratuko dute ekitaldia, eguna, ordua, argazkia eta beharrezko informazio guztia.
Agenda hori Kronikaren web orritik elikatuko dute, eta bi plataformatan ikusiko da: www.kronika.eus web orriko agendan, eta Natzaren mugikorretarako aplikazioan. Biek batera funtzionatuko dute.
Orain, elkarteen txanda
Behin bi agendak sinkronizatuta, eta funtzionatzeko modua zehaztuta, elkarte eta taldeen txanda da. Bakoitzak erabiltzaile bat izango du, eta gune pribatu batean, hainbat aukera izango dituzte: ekitaldi probisionalak sortu; gainerako taldeek egun bakoitzerako dauzkaten asmoak ikusi; eta ekitaldia konfirmatzean, publiko egin.
Biteriko sukaldean izango da saioa, 18:00etatik 19:00etara. Elkarte eta talde guztiak daude deituta.
Hain zuzen ere, funtzionamendua azaltzeko, eta zalantzak argitzeko, bilera-ikastaroa antolatu dute Kronikak eta Natzak etzi, ostegunean, Hernaniko Biteri kultur etxean. Ordubeteko saioa izango da, arratsaldeko 18:00etan hasi eta 19:00etara arte, Biteriko sukaldean.
Urumea bailarako elkarte eta talde guztiei luzatu nahi diete gonbitea, bertaratzeko eta Agenda bateratuan parte hartzeko. Izan ere, tresna baliagarria izango da guztiontzat: bai elkarte eta taldeentzat, ekitaldiak noiz antolatu erabakitzeko; eta baita herritarrentzat ere, egun bakoitzean zein ekitaldi dauden ikusiko dutelako, modu erraz eta erosoan.