Etxeko zelaian nagusi dela erakutsi zuen atzo Hernanik. Partiduaren aurreneko zati osoan atzetik ibili zen, leporaino lokaztuta. Baina egoera horretan ere, erakutsi zuen aurrera egin eta garaipena lortu arte borrokan segitzeko gaitasuna duela: 23 eta 13 irabazi zion Getxori.
Denboraldiko bigarren garaipena izan zen gainera; aurrenekoa ere derbi batean, Ordiziaren kontra, lortu zuen. Eta zenbakia borobiltzeko, Hernanik Ohorezko Mailan lortzen duen ehungarren garaipena ere izan zen, atzokoa.
Leporaino lokaztuta ere, ez zuen etsi
Aurreneko zatiak irrist egin zion Hernaniri. Laugarren minutuan Getxo aurreratu zen, zigor kolpe batekin, eta Hernanik Anartz Elosegiren beste batekin berdindu bazuen ere, 20garren minutuaren bueltan, Getxok egin zuen entsaioa, 3 eta 8koa lortuz.
Aurreneko zatia bukatu bezala joan ziren bigarren zatiko 20 minutu ere. Orduantxe, zigor kolpea egin zuen Genuak, eta handik 6 minutura, metro dezente egin zuen aurrera, sarrera bortitz bati esker. Pello Perezi baloia pasa eta honek egin zuen entsaioa ia; plakatu egin zuten. Jon Insaustik, ordea, eutsi, eta lortu egin zuen; eta Genuak, transformatu: 13-8. 72garren minutuan beste zigor kolpe bat egin zuen Genuak, eta 78garrenean, Iban Moreiraren entsaioak eta Genuaren transfromazioak 23 eta 8koarekin jarri zuten Hernani.
80garren minutua gaindituta egin zuen Getxok, 23 eta 13koa eman zion entsaioa.