Gazte Lokalen inguruan dagoen kezkari erantzuna eman dio Udalak, aurkeztu berri duen ekimenarekin: gomendio gida bat osatu du, lokaletako gazteen eta bizilagunen arteko elkarbizitza sustatzeko asmoz. Ostegunean egin zuten aurkezpena Biterin, Garazi Etxarrik, Beatriz Menak eta Marijo Garciak. Azaldu zuten, ekimen honen helburu nagusia dela gazteen lokalen fenomenoak herrian sortu ditzakeen arazoak gutxitzea: «horretarako, errespetatu behar da gazteek aisialdiaz gozatzeko duten eskubidea eta bizilagunek atsedenerako duten eskubidea».
Hiru protagonista
Udalak badaki gazte lokalak Hernaniko gazte askoren aisialdi gune direla, lagunekin elkartzeko lekua. Eta era berean badaki, errealitate honetan beste bi protagonista ere badaudela: lokalen jabeak, eta ondoan bizi diren bizilagunak. Guztien arteko elkarbizitza egokia bermatzeko helburuarekin, Udalak zenbait gomendio jaso ditu, formatu ezberdinetan, bakoitzari egokituta.
Helduentzako esaterako, eskuliburu bat osatu du Gomendio Gidarekin. Bertan, helburuez gain, azaltzen dira lokalen egoera, bizikidetza bermatzeko ereduak, gatazkaren aurrean zer egin... Eskuliburu hauek eskuratu daitezke Herritarren Harrera Zerbitzuan eta Udalaren webgunean.
Gazteentzako berriz, kartel bat diseinatu dute. Kartelean, gazteei egokitutako letratipo eta irudiekin, gomendioak ematen dira hondakin, segurtasun, zarata eta bizikidetzaren inguruan. Lokal guztietan banatzea da helburua.
Udalak bitartekaritza zerbitzua, gazteek izena emanez gero
Bestalde, ekimenaren beste nobedadeetako bat da, Udalak bitartekaritza zerbitzua eskainiko duela. Gazteria arloak kudeatuko du, eta arazoaren arabera, arlo hauek hartuko dute parte: segurtasuna, hondakinen kudeaketa eta bizikidetza: «egunerokoan azaltzen joango diren gatazken aurrean, Udalak adostasunera iristeko bidea erraztu nahi du, elkar ulertzea eta errespetua oinarri izanda». Udalak zerbitzu hau eskaintzeko, lokaletako erabiltzaileek izena eman behar dute Bitartekaritza Zerbitzuan. Gogoratu dute gazteek libreki erabaki dezaketela izena eman edo ez, «baina bide hau aukeratzen dutenek Udalaren informazioa eta orientazioa jasoko dute, eta mota ezberdinetako gatazkak kudeatzeko bitartekari baten laguntza izango dute». Izena ematen ez dutenei, arazoren bat dagoenean, zuzenean aplikatuko zaie Udaleko arautegia.
#gaztetuhernani prozesuaren emaitza
Aurkezpenean gogoratu zuten prozesu hau 2013an hasi zela, #gaztetuhernani prozesu partehartzailearen baitan: «Aztikerrek lokaletako jabe, erabiltzaile eta bizilagunekin egindako lanarekin abiatu zen, eta Udalak proposamen bat landu du. Proposamen hori irailean aurkeztu zitzaien Gazte Kontseiluko kideei, 60 lagunetik gora zeuden egun hartan, eta hauek ontzat eman zuten. Bi Batzorde Informatzailetan ere aurkeztu zaie Udaleko gainerako alderdiei».