Aire-zarataren isolamenduaren inguruko azterketak egin ditu Udalak Astigarragako 16 ostalaritza establezimendutan. Hain zuzen, prentsa-ohar bitartez azaldu dutenez, «lokal bakoitzaren eta haren gaineko etxebizitzaren arteko isolamendu maila neurtu du». Eta horrela, «ordenantzaren betetze-maila ezagutzea lortu du».
Izan ere, azterketa hauen helburua izan da «Astigarragako bizilagunak zaratak eragindako kutsaduratik babestea».
Musika mugagailu erregistratzaileak, gerora
Udalak onartu du ez dela gai erraza: «ostalaritza lokalek sortzen duten zarata beti izango da gai korapilatsua eta funtsezkoa da konponbideak jartzea elkarbizitza hobetze aldera. Gainera, gure herrian dimentsio haundiagoa hartzen du txotx garaiean».
Horregatik, batez ere garai horri begira, aldaketak egingo dituela iragarri du: «horietako bat ostalaritza establezimenduetan musika mugagailu erregistratzaile berriak jartzea izango da». Egindako azterketen arabera, «ekipo bakoitza zein mailatara mugatu beharko den jakin ahal izan du Udalak».
Gainera, azaldu du emaitzak «orotarikoak» izan direla, eta horren arabera eman beharko dituztela hurrengo pausoak.