Errefuxiatuei elkartasuna adierazteko jardunaldiak antolatu ditu herritar talde batek aste honetan, Argi izpi bat itsas ilunean. Ongietorri, errefuxiatu! izenburupean. Ostegunean eman zieten hasiera ekitaldiei, pintxopote bereziarekin. Eta ostiralean ere izan ziren hainbat ekintza: Yo estoy con la novia pelikula ikusi zuten Martuteneko Arantzazuko Amako ikasleek, eta ondoren, hitzaldia eskaini zuten Salvamento Marítimo Humanitarioko bolondresek, baita gaiari lotutako antzerki bat ere.
Baina ez dira aste honetako ekintza bakarrak izango, izan ere, gaur eta bihar ere, izango da tartea errefuxiatuen egoeraz hausnartzeko.
Proiekzio irekia, gaur
Arantzazuko Amako ikasleekin egin zuten bezala, nahi duten herritarrek Yo estoy con la novia pelikula ikusteko aukera izango dute gaur, iluntzeko 20:00etan hasita. Behin pelikula bukatuta, protagonistekin solasaldia ere izango da. Kultur etxean egingo dituzte bi ekintzak, eta elkartasunezko 2 euro ordaindu beharko dira sartu ahal izateko.
Azoka solidarioa, bukatzeko
Bestalde, bihar izango da azkeneko eguna, eta hori ospatzeko, kalera aterako dira. Hain zuzen, azoka solidarioa egingo dute Joseba Barandiaran plazan, eta han salduko dituzte, besteak beste, Zaporeak eta SMH taldeko materiala, gozoak, pintxoak, pitxiak... Umeentzako jolasak eta musika ere, ez dira faltako.
Erakusketa ere, bihar arte
Ekintzez gain, erakusketa ere izan da aste honetan zehar. Javi Julio argazkilariak Grezian bizitutako esperientzia islatu du argazkitan, eta horiek herriko hiru txokotan jarri dituzte: Ikatza eta Zipotza tabernetan, eta Ogi Berrin. Gaur izango dute astigartarrek, argazkiak ikusteko azkeneko aukera.