Goxo eta bero helduko diote aranoarrek, neguaren etorrerari. Atzo izan zen San Martin eguna, eta gaur ospatuko dute Aranon, goizetik iluntzera.
Goizean goiz hasita hartuko baitute berotua! Baina baita gozatua ere. 09:30etan abiatuta, mendi bueltarako jarri dute zita, goizuetarrekin topaketa egiteko mairu-baratzeetan. Juan Mari Ansa izanen da gonbidatu berezia.
Sagar-jotze eta txalaparta tailerrak, arratsaldean
Bi tailerrekin ekinen diote arratsaldeari, 18:00etan hasita. Batetik, sagarra jotzen ikasteko aukera izanen dute. Eta bestetik, txalaparta jotzen trebatuko dira.
Gero, 19:30etan, Gure Esku Dago dinamikaren aurkezpena eginen dute.
Eta eguna bukatzeko, tripa betetzeko eta berotzeko ere izanen dute parada: taloak egin eta gaztainak erreko dituzte, eta bietaz gozatzeko aukera izanen dute bertaratzen diren guztiek, iluntzeko 20:00etatik aurrera.