Oraindik egun batzuk falta dira Santa Zezilia, musikarien patroiaren eguna iristeko, baina musika inguru guztietara ari da zabaltzen.
‘Bitartean’ eta Doinu Zale, kanpoan
Herritik kanpora ariko dira herriko musikari batzuk. Bitartean folk musika taldeak Pasai Donibaneko Victor Hugo kultur etxean joko du gaur, 20:00etan, eta hilaren 19an Adunako elizan, 22:00etan.
Doinu Zale musika eskolako akordeoi orkestra eta Ozenki abesbatza, berriz, Zarauzko Modelo aretoan izango dira gaur, 22:00etan, eta hilaren 19an, Andoaingo Santa Kruz ermitan, 20:00etan, bertako Txistulari Banda eta txarangarekin.
Txistulariek eta Musika Bandak, Aragues, bihar
Hernaniko Musika Bandak, berriz, bihar, 20:00etan San Joan Bataiatzailea elizan joko du Donostiako Txistulari Bandarekin batera. Besteak beste, Araguesen Txistu eta Orkestrarako Kontzertua joko dute, Jon Ansorena txistulari hernaniarra bakarlari lanetan jarrita.
Goizean, ohi bezala, Kalez Kale Kantari izango da (12:00), eta 18:30etan erromeria.