«Desberdin pentsatzeagatik ez dugu etsai izan behar»

Bizikidetzaren aldeko he­rri­tar ekimena bultzatu dute 10 her­naniarrek azken bi urte­e­tan, «desberdinekin elkar­tze­ko beharrak» edo «besteak en­tzun eta ulertzeko nahiak» edo­ta «hitz egin eta ezta­bai­da­tzea, egin daitekeen eta egin be­har den zerbait dela sinis­teak» bultzatuta. «Desberdin pentsatzen dugunok ez dugu zertan etsai izan behar!».
Errioguar­dan, «gure txoko­an», bildu izan dira hilean behin, asteartez, eta txoko hori ireki eta herritarrekin mahai-ingurua antolatu zu­ten here­ne­gun, bi urte haue­tan bizi izandakoa kontatzeko; herna­niar gehiagori zabal­tze­ko bizi­ki­detzaren aldeko erron­kari hel­tzeko gonbidapena.

Errenteria, abiapuntu
Hiruzpalau hernaniar Erren­terian, biktima desberdinen arteko el­ka­rrizketetan izan ziren orain bi urte pasatxo, eta hango espe­rien­tzia Hernanira ekarri zitekeela pentsatu zuten.
Esan eta egin. Batzuk el­kar­tzen hasi zirelako, eta beste ba­tzuk, elkartzeko deia jaso zu­te­lako; Ricardo Crespo Ru­bio, Itzi­ar Egiguren Rekalde, An­tton Elor­­za Pu­ya­dena, Fe­li­pe Etxe­be­rria Agi­rre­txe, Jon Fer­nández Usa­­rraga, Juan Ba­tti Izagirre San­­tes­teban, Yon Na­barro Ez­ke­­rra, Rosa Pe­lle­jero Alkorta, Ira­­txe Ugalde Etxe­zarreta eta Aran­­tzazu Zu­gas­ti Arizmendi izan dira az­ken bi urte hauetan ari­keta egin dutenak, batak bes­tea erres­petuz entzutekoa, au­­rrei­ri­tziak gainditu eta elkar uler­tzekoa, batak bestearen bizi­penak ezagutzekoa, barrua hus­tu eta biluztekoa, orain ar­teko elkarbizitza arautu du­ten kodigo hertsiak pus­ka­tzekoa.
Horrela, erabaki dute «egia bakar baten ordez, egietaz hitz egitea. Indarkeria kontzeptu zurrun eta bakarraren au­rre­an indarkia bat baino gehiago dau­dela kontuan izatea. Bik­ti­ma mota bakarra dagoenaren ideia­ren aurrean, beren es­kubideak ukatzen zaizkienen sufrimendua onartzea».

Oinarri sendoa prest, gai korapilatsuei heltzeko
Hori guztia egiteko, kon­fian­tzazko giro segurua sortu be­har izan dute taldekideen ar­te­an, eta orain, «oinarri sen­doa jarrita, gai kora­pilatsuei hel­tzeko prest» dau­dela sen­ti­tu dute. Horregatik eman nahi izan dute eza­gutzera orain arte egindako lana, «herri­ta­rren arteko bizi­ki­detza in­klu­sibo bat lortze al­dera».
Hori horrela, taldetik kan­po­ko herritarren iritziak jaso nahi izan zituzten; helbide elek­tronikoa ere eskura dute: bizikidetzahernani@gmail.com. Era berean, talde hetere­oge­noa izanda ere, Hernani osoa or­dez­katzea ezinezkoa dela azal­du zuten, eta talde gehiago sortzera animatu zi­tuz­­ten he­rri­tarrak. «Denok egin deza­ke­gu ekarpenen bat».