Herri galdeketa egingo dute 2017ko udaberrian Astigarraga eta Hernanin, BagaGiltza herri plataformak antolatuta. Eta atzera kontakeri hasiera berezia emateko, Udaberri Festa antolatu dute larunbat honetan, Hernanin. Arratsaldeko 16:30etatik aurrera izango da Atsegindegin (azken momentuko aldaketa baten ondorioz).
Astigartarrek, ordea, lehenago izango dute hitzordua. Arratsaldeko 15:30etan elkartuko dira Joseba Barandiaran plazan, eta bertatik Hernanirantz abiatuko dira oinez, trikitilari, pandero-jole eta dultzaineroen laguntzaz.
Ergobian geldialditxoa egin ondoren, 16:30ak aldera iritsiko dira Udaberri Festara, eta ongietorri berezia egingo diete hernaniarrek.
100 sinadura biltzea, erronka
Dantza, musika, kirola, jolasak eta beste ekintzen artean, ekitaldi nagusia izango da Udaberri Festaren ardatza. Bertan iragarriko dute noiz egingo den herri galdeketa bi herrietan. Eta orduan hasiko dira, baita ere, sinadurak biltzen.
Astigarragako erroldaren %10a behar dute galdeketa antolatzeko, hau da, 500 astigartarrek sinatzea. Eta ez dute nolanahi hasi nahi, erronka jarri diote beraien buruari: baietz Udaberri Festaren aurreneko asteburu horretan 100 sinadura bildu!