Hernanin nabaria da mendiarekiko dagoen zaletasuna, eta hori ondo daki Mendiriz Mendi elkarteak. Urtean zehar hainbat ekimen antolatzen dituzte, tartean, hilero heldu zein umeekin egiten dituzten irteerak. Eta urteroko hitzordu garrantzitsu horietako bat izaten da Mendizale Astea. Normalean elkartean ibiltzen direnez gain, herritar ugari animatzen baita hitzaldiak entzutera.
Gaur hasi eta igandean bukatuko da Mendizale Astea. Aurreneko lau egunetan hitzaldi-aurkezpenak antolatu dituzte. Gaurkoan Aloña Mendi espeleologia taldea gonbidatu dute. Biterin kontatuko dute, besteak beste, Urzulo kobazuloan aurkitutako ustekabea: sifoi txiki bati esker, kobak aurrera egiten duela konturatu ziren, eta espeleologoek aurre egin behar izan zioten erronka horri. 19:30etan hasita, lorpen eta porrotak kontatuko dituzte.