Musika Banda eta txistua uztartuz, Aragues eta Ansorena

Bi kontzertu berezi eskaintzeko bat egin dute Hernaniko Mu­si­ka Bandak eta Donostiako Txis­tulari Bandak. Aurrenekoa bihar izango da, 12:00etan Donostiako Antzoki Zaharrean, eta hurrena, hilaren 12an Hernanin, 20:00etan San Joan Bataiatzailea parroki elizan. Biak debaldekoak izango dira; sarreran bertan txartela eskatu beharko da.

Txistuaren hots fina, musika bandarekin batuta
Ez dira ohiko emanaldiak izango; txistua eta musika banda bat eginda entzuteko aukera izango baita. 
Tartean, Tomas Araguesek idatzitako Txistua eta Orkes­trarako Kontzertua entzuteko aukera izango da; Jose Ignazio Ansorenak estreinatu zuen 1984an, eta Jon Ansorena txistulari hernaniarra izango da bakarlaria, oraingoan.
Hain zuzen, Jon Ansorenak orain urtebete bukatu zituen Goi Mailako txistu ikasketak Do­nostiako Musikenen, eta ikas­keta amaierako lana Ara­gue­sen obra honi buruzkoa egin zuen. «70eko hamarkadan txis­tuak hobekuntza nabarmenak izan zituen, bereziki, afi­na­zioari eta errepertorioari da­go­kionean. Eta Tomas Ara­guesek, aurrenekoz, txistua eta or­kestra uztartuko zituen Kon­tzertua idatzi zuen, hain zuzen, Jose Ignazio Ansorenari berari eskainia; neurri haundi batean, ordura arteko txistuaren afinazio arazoak konpondu zirelako», azaldu du Jon Ansorenak.

Bi emanaldiak debaldekoak izango dira; sarreran bertan txartela eskatzea nahikoa izango da.

Obra alaiak eta sakonak
Aragusen Kontzertua ez da, ordea, Hernaniko Musika Ban­dak eta Donostiako Txis­tu­lari Ban­dak joko duten bakarra, Ro­berto Pachecho eta Jose Ignazio Ansorenak zuzenduta.
Txistuaren soinu dantzaria bestelako tresnek emandako sakontasun eta koloreekin nahastuko dela diote programan. Besteak beste, joko dituzte Sorozabalen Donostia, Aran­bu­ruren Hartzaren ehiza, Goro­sa­rriren Idiarena, Erauskinen Mendirik Mendi...