Denen bistara txerririk ez dute hilko Aranon, San Martin egunaren bueltan. Baina neguaren etorrerari aurre egiteko beste hainbat ekitaldi prestatu dituzte, larunbaterako.
Goizuetarrekin batera, ibilaldia
Ostiralarekin egokitu da aurten San Martin eguna, baina larunbatarekin, azaroaren 12an ospatuko dute aranoarrek. Hainbat ekitaldi prestatu dituzte egun horretarako; hasteko, goizean mairu-baratzeetan goizuetarrekin topaketa. Ibilalditxoarekin, gose pixka bat eginen dute, arratsalderako.
Sagar jotzearekin batera, txalaparta tailerra emanen du Arantxa Ansak.
Sagar, gaztain eta talo, negurako pronto
Arratsaldea, berriz, erritmo biziarekin hasiko dute. Sagar jotzea eta txalaparta tailerra eginen dituzte aurrena, 18:00etan hasita, Arantxa Ansak gidatuta.
Eguna ondo bukatzeko, berriz, iluntzeko 20:00etatik aurrera nahikoa gaztain eta talo izanen da, bertaratzen diren guztiek bapo afaltzeko eta neguaren etorrerari aise aurre egiteko indarrak biltzeko.