Asteburu garrantzitsua dute aurretik Gipuzkoako Txapelketa jokatzen ari diren pelotariek, tartean hiru bikote hernaniarrek. Horietako bik Hernanin bertan jokatuko dute gaur; azkena, bihar lehiatuko da, Tolosan.
Seniorrak, etxean
Gaur izango dira aurreneko partiduak, arratsaldeko 15:00etan, kiroldegiko frontoian. Seniorren txanda izango da orduan. Hasteko, 1go mailako Iñigo Urkizu eta Iñigo Labaka hernaniarrek Tolosako Elola eta Arratibelen kontra jokatuko dute. Partidu erabakigarria dute aurretik, galtzen duenak datorren denboraldian 2garren mailan jokatu beharko du eta.
Partidu hori bukatuta, Ohorezko Mailako Ioritz Arrieta eta Eneko Aizpitarte seniorrak sartuko dira frontoira. E. Labaka eta Telletxea tolosarren kontra ariko dira han, eta bien arteko lehian garaile ateratzen denak, Gipuzkoako Txapelketako finalean jokatzeko ohorea izango du.
Kadeteak, bihar
Bihar, aldiz, hernaniarrek bisitatuko dituzte tolosarrak. Goizeko 10:00etan hasita, Xabier Salaberria eta Oihan Zugasti kadeteek Ilunpeko Alberdi II eta Buldainen aurka neurtuko dituzte indarrak. Kasu honetan ere, irabazleak finala jokatuko du datorren astean, Tolosan.