Udalak bi ekitaldi antolatu ditu aste honetan Oroimena berreskuratuz, udazkenetik udaberrirantz izenburupean. Helburua da frankismoaren biktima ororen memoria gogora ekartzea: hau da, oroimena berreskuratzea eta aitortza egitea errepresioa sufritu zutenei eta haien senideei. Atzo jendetza gerturatu zen Biterin egin zuten proiekzio solasaldira; bigarren ekitaldia bihar izango da, hilerrian bertan.
Hernaniarrei gonbitea, bihar
Omenaldia egingo diote bihar hilerrian, bertan fusilatu eta dokumentatu gabe lurperatu zituzten berrehun bat pertsonei: «egia osoa ezagutu behar dugulako, eta justizia aldarrikatu haientzat eta haien familia eta senideentzat».
Gidari aurkezle lanak Irati Sarasua eta Jon Odriozola hernaniarrek egingo dituzte. Musika Joxan Goikoetxeak joko du; eta bertsotan Amets Arzallus ariko da. Ondoren Alkateak hitz egingo du, eta bukaeran lore eskaintza egingo dute. Ekitaldirako biktimen eta fusilatuen senideak gonbidatu dituzte; eta baita ere, fusilatuen herritako Udalak edo Alkateak, memoria lantzen duten elkarteak eta asoziazioak. Hernaniarrak ere gonbidatu dituzte «askok eta askok, edo hain senideek, sufritu baitzuten frankismoaren errepresioa».