Hitzordu berria dute bihar Lizeagako auzotarrek: Lizeaga 3.0 prozesuko bilera. Urumea ikastolan izango da, 19:00etatik 21:00etara. Hausnarketa faseari ekingo diote bihar; urrian adostutako diagnostikotik abiatuko dira, eta auzoak nola eboluzionatu dezakeen aztertuko dute. Helburua izango da, 10 urteko epean egi bihurtu daitekeen Lizeaga bat diseinatzea.
Urrian, diagnostiko tailerra
Urrian egindako azken saioan diagnostiko tailerra egin zuten auzotarrekin batera. Tailerraren helburua izan zen Lizeagak dituen arazoak eta aukerak identifikatzea.
Prozesua aurrera daraman RB3 enpresak kronikari azaldu dionez, azken tailerrak agerian utzi zuen adostasun maila altua dagoela auzotarren artean: «zenbait arazori lehentasuna eman zitzaien eta beste batzuk nabarmendu egin ziren. Denek aipatu zuten espazio publiko faltak auzoan eragiten duen bizi kalitate kaxkarra; hain zuzen, arazo horrek , beste batzuk areagotzen dituela». Ibilgailu pribatuen arazoa ere aipatu zen bileran: «Urumea eta Elizatxo ikastolen sarrera-irteerek asko eragiten dutela. Ibilgailuek oinezkoek baino protagonismo gehiago dutela». Gertuko komertzioa galdu izana ere, aipatu zen tailerrean: «lokal hutsak auzorako hobekuntza gisa ikusi dira». Irisgarritasun arazoak ere landu ziren: «hobekuntzak eman badira ere, oraindik badaude arazoak». Auzoaren itxura eta egiturari buruz ere, hitz egin zuten: «estigmatizazio arazoak indar haundia du oraindik. Egiturari dagokionean, zatiketa bat dago goi eta behe aldean, eta auzotarrek ezberdin erabiltzen dute auzoa». Erdigunearekin duen gertutasuna aprobetxatu daitekeela ere esan zuten: «proiektu berritzaile batek periferia izaera aldatzeko aukera eman dezake».