Mobilizazio eguna antolatu zuten atzo Gipuzkoa Zutik taldeak eta Erraustegiaren Kontrako Mugimenduak, erraustegiaren kontra. «Gutxi batzuen negozioa, denon minbizia eta ruina» lelopean egindako martxa zaratatsuarekin hasi zuten eguna. Eguerdiko 12:00etan Plaza Berritik abiatu zen martxa jendetsua eta FCC eta GHKren egoitzetan geldialdi bana egin zuten.
Balorazio positiboa
Bertan izan zen, esaterako, Juanmi Galatas, Erraustegiaren Kontrako Mugimenduko kidea: «Positiboki baloratzen dugu. Parte-hartze nahiko ugaria izan du; 500 bat pertsona izan direla kalkulatzen dugu», onartu du.
Galatasek azaldu duenenez, erraustegia eraiki nahi dutenei «adierazi nahi izan diegu aurrean izango gaituztela, ez diegula erraz jarriko». Eta hemendik aurrera, zabaldu nahi duten mezua da: «promotorearen, enpresen eta bankuen aurrean jarraituko dugula, ez dugula etsiko».
Festa, bukatzeko
Ondoren, festa Tilosetara lekualdatu zen, eta bertan egin zituzten hainbat ekintza: bertsolarien emanaldia, tailerrak, poesia...