Azken txanpan da dagoeneko 2017ko Hernani Erabaki prozesua. Herenegun aurkeztu zuen talde eragileak aurrekontu parte-hartzaileen laugarren fasea, eta horren arabera, 34 proposamenen artean, 10 hautatu beharko dituzte 16 urtetik gorako herritarrek, aurten. Azaroaren 18ra arte jarri dute bozkatzeko aukera.
Hiru modu, bozkatzeko
Horretarako, hiru modu egongo direla jakinarazi zuen Talde Eragileak herenegun. Bata, astelehenetik aurrera herritarrek etxean jasoko dituzten diptikoak bete, eta buzoietan sartuta. Bigarrena, Internet bitartez, erabaki.hernani.eus web orrian. Eta azkenekoa, auzoz auzo egingo diren bileretan.
Aurkezpenak, ere bai
Bozkatzeko aukera izateaz gain, proposamenak ere aurkeztuko dira auzoetan. Denera, zortzi bilera egingo dira, auzo desberdinetan: Kaxkoan, Portun, Latsunbeberrin, Lizeagan, Karabelen, Sorgintxulon, Etxeberri-Floridan, eta Zikuñagan. Arratsaldeko 19:00etan izango dira denak, auzo bakoitzeko elkartearen lokalean.
600 proposamenetatik, 34ra
Aurreko maiatzean eman zitzaion hasiera Hernani Erabaki 2017ri. Maiatzetik ekaina bitarte, lehenengo fase horretan, 600 proposamenetik gora jaso zituzten. Ondoren, ekainetik irailera arte, Udaleko teknikariek proposamenak banan bana aztertu eta baloratu zituzten.
94 proposamen lehenetsi zituzten herritarrek hirugarren fasean, horiek lehenesteko ranking bat eginez.
Horrela erabaki ziren, azkenik, azkeneko fase honetara iritsi diren 34ak, orain herritarren esku geratzen direnak.
Fase erabakiorra, etzitik
Etzi hasiko dena, «fase erabakiorra» dela onartu zuen Talde Eragileak aurkezpenean, «herritarrek Udal erabakietan parte hartzeko aukera paregabea dutelako». Hori dela eta, herritarrak animatu zituzten une erabakior honetan parte hartzera.
Proposamenak, ikusgai
Diptikoa etxeetara bidaliko dute, baina ordura arte, www.kronika.eus-en dago ikusgai.
BILERAK AUZOETAN
Azaroak 2: Kaxkoa
Azaroak 3: Portu
Azaroak 4: Latsunbeberri
Azaroak 7: Lizeaga
Azaroak 9: Karabel
Azaroak 10: Sorgintxulo
Azaroak 14: Etxeberri-Florida
Azaroak 16: Zikuñaga