Han eta hemen, Hernaniko atletek ez dute hutsik egiten astebururo jokatzen diren lasterketa ezberdinetan. Joan den asteburuan Anartz Artola txapeldun izan zen Espainiako Kopako azken lasterketan. Hoki Gerrero hernaniarra berriz, Zubiri-Iruña proban izan zen, eta hirugarren egin zuen, beterano mailan; 1:28:10 denbora egin zuen.
Mendi denboraldi motza baina probetxuzkoa, Artolak
Txikitatik gustatu izan zaio Anartz Artola atleta hernaniarrari mendian korrika aritzea, nahiz eta 16 urteak bete arte ez zuen lasterketarik korritu. Ereñotzuko mendi lasterketan atera zen aurreneko aldiz, joan den urtean, eta bertan lortutako emaitza onak motibatuta, mendi denboraldia ere prestatzea erabaki zuen. Krosean emaitza oso onak lortu eta gero, mendi denboraldiak prestatzeari ekin zion Artolak. Maiatzean Zegama-Aizkorriko mendi lasterketa motzean hartu zuen parte: 2garren euskalduna eta 16 urteko lehenengo korrikalaria izan zen. Bi astera, bigarren egin zuen Ereñotzun. Euskal Herriko Mendi Lasterkarien Selekzioa Artolarekin harremanetan jarri zen emaitzak ikusita. Bertako kide izatea erabaki, eta aukera izan du Artolak Espainiako Mendi Lasterketen Kopan parte hartzeko. Abuztuaren 7an Castellonen izan zuen aurreneko proba, selekzioarekin, eta hirugarren egin zuen. Azkenekoa joan den asteburuan izan zuen Artolak Montsenyn, eta txapeldun izan zen denboraldia borobilduz.