Gipuzkoako Erregimena Errefuxara. Erraustegiaren Zorraren Festa izenburupean, erraustegiaren kontrako eguna antolatu dute bihar Hernanin.
FCC eta GHKra martxa, ekintza nagusien artean
Eguerdiko 12:00etan hasiko dute mobilizazio eguna. Orduan, Plaza Berritik FCC enpresara eta Gipuzkoako Hondakinen Kontsorzioaren (GHK) egoitzara egingo dute martxa, «gutxi batzuren negozioa, denon minbizia eta ruina» leloarekin.
Martxa zaratatsua izango da, eta umorea ere ez da faltako. Izan ere, protesta-martxa GHKren aurrean parodia batekin bukatuko da. Horren aurretik, FCCko egoitzetako bat bisitatuko da, erraustegia eraikitzeko eta kudeatzeko eskaintza egin duten enpresetako bat izateagatik.
Herri bazkariarekin, hasiera beste ekintzei
Protesta-martxa bukatuta, 14:00etan, herri bazkaria egingo dute Tilosetan, eta jakinarazi dute aurretik ez dela izena eman behar, ezta txartelik erosi behar ere.
Bazkaldu ondoren, beste hainbat ekintza izango dituzte bertaratutako guztien gozamenerako: Ane Labaka eta Maider Arregi bertsolariak, Pobresiaken poesia musikatua, haur jolasak, margoketa-lantegia eta beste animazio batzuk. Musika ere ez da faltako, eta horretarako, DJ Miau, Morau eta Duo Do Portu taldeak hartuko dute parte.
Herritarrei deia, ekintzetan parte hartzeko
Bihar egingo duten festaren aurrean, Erraustegiaren Kontrako Mugimenduak eta Gipuzkoa Zutik taldeak deialdi bateratua luzatu nahi diete herritarrei, eta erraustegiaren aurka egingo dituzten ekintza guztietan parte hartzera animatu nahi dituzte; bai eguerdiko martxan, baita ondorengo festan ere.