25 urte beteko dira urriaren 18an Hernaniko Udal Euskaltegiak bere ateak ireki zituenetik, eta orduan hasi ziren bertako irakasleak aurreneko eskolak ematen.
Euskeraren alde egindako lan guztia aldarrikatu eta data berezia ospatzeko asmoz, ekitaldi xume bat antolatu dute gaurko.
Arratsaldeko 19:00etatik aurrera, bat egingo dute Biteriko areto nagusian 25 urte hauetan euskaltegiaren parte izan diren guztiek.
Dokumentala, hasteko; musika, gero
Ekitaldi berezia 25garren urteurrena ospatzeko irakasle, ikasle eta ikasle ohiekin batera grabatutako dokumentalaren proiekzioarekin hasiko da.
Eta gero, ekitaldia borobildu eta musikaz girotzeko, emanaldia izango da, herriko hiru musikariren laguntzarekin; horiek dira, hain zuzen, Joxan Goikoetxea, Mikel Urdangarin eta Josune Marin.
Irakasle, ikasle eta ikasle ohiek euskaltegiaren 25 urteak ospatzeko dokumentala grabatu dute.
Gonbidapena, bertaratzeko
Egun garrantzitsua izango da oso Udal Euskaltegiaren parte diren eta izan diren guztientzat. Horregatik, euskaltegiko zuzendaritzak gonbidapena luzatu nahi die herritar guztiei bertaratu eta beraiekin egun hau pasatzera.