Greba eguna deitu du Espainiako Sindicato de Estudiantesek gaurko. Ildo horretatik, Hego Euskal Herrian ere hainbat deialdi deitu dituztela jakinarazi du Hernaniko Hezkuntza Plataformak, eta horregatik, bere iritzia plazaratu nahi izan du taldeak.
Kronikara bidalitako prentsa-oharrean diote, Hezkuntza Plataformak erabaki duela «egun horretarako postura zehatzik ez hartzea».
Erabaki horren zergatia azaldu nahi izan dute: «arrazoia da hezkuntza eragileen deialdi bateraturik ez dagoela».
Dena den, diotenez, «iazko ildoari jarraituz, LOMCE/Heziberriri planto egitea da gure plangintza eta horren inguruan herri mailan guztiok elkarrekin lan egitea dugu helburu nagusia momentu honetan».
Bulebarrera joateko, gonbitea
Ohar berean, gaur arratsaldeko 18:00etan Donostiako Bulebarrean egingo duten kontzentrazioan parte hartzeko gonbitea luzatu nahi du Hernaniko Hezkuntza Plataformak, «norberak nahi duena egiteko askatasun osoarekin, noski!».