Gaur bilduko da Udaleko Plenoa, eta 2017ko Ordenantza Fiskala izango da aztertuko duten gaietako bat. Horren inguruan, Udal Gobernuak dagoeneko egin du proposamen bat, eta hori da, hain zuzen, Plenoari aurkeztuko diona.
Proposamen horren nondik norakoak aurkezteko, prentsaurrekoa eman zuten atzo Isa Sanchez, Ogasuneko zinegotziak, eta Mattin Aldaia, Ingurumen zinegotziak. Beraiek azaldu zutenez, aurten hainbat aldaketa emango dira: «krisialdi ekonomikoa dela eta, herritar askoren egoera ekonomikoa okerrera joan dela kontuan hartuta, Hernaniko Udalak hiru urtetan zergak ez igotzea erabaki zuen. Baina zerbitzuen kalitatea bermatzeko ezinbestekoa da koste errealera pixkanaka-pixkanaka egokitzea, eta horregatik, 2017rako udal tasa eta zerga batzuk egokituko ditu Udalak».
Aldaketak, zergetan
Zergei dagokienez, IBI edo OHG erresidentziala, IBI edo OHG industriala eta Ibilgailuaren gaineko zerga daude. IBI erresidentzialak Udalak ezarritako tipoa eta balio katastrala hartzen ditu kontuan. Hori horrela, Sanchezek azaldu zuenez, «Udalak ez du bere tipoa aldatuko. Balio katastrala, aldiz, Gipuzkoako Foru Aldundiak ezartzen du, eta aurten eguneratu ditu balio horiek. Hori dela eta, 2017an ordainduko dugun kopuruan aldaketak egon daitezke».
IBI industriala, aldiz, %10 igoko du Udalak Gobernuaren proposamenaren arabera, baina Diputazioaren katastroaren eguneraketan lurzoru eta eraikuntza industrialek balio galtzen dutenez, «bi balioak orekatzen dira».
Azkenik, Ibilgailuaren gaineko zerga %1a igoko da tramo guztietan.
Hondakin tasa, %15 gora
Hondakin tasa izango da igoera haundiena jasango duena, %15a igoko da, hain zuzen. Mattin Aldaia Ingurumen zinegotziak azaldu du San Markori ordaindu behar zaion kopuruarengatik dela: «San Marko Mankomunitateak, EAJ eta PSE agintean daudela, igoera izugarria ezarri dio Hernaniko Udalari. Errefusa tratatzeagatik kobratzen dion tarifa %20a igo du, eta organikoa tratatzeagatik, %91a». Bestalde, «auzoetan jarritako etxoletan konposta egiten duten herritarrek orain arte %40ko hobaria jaso dute. 2017an hobari hori %25ekoa izango da».
Beste igoera batzuk, ere bai
Hirigintzak obretarako ematen dituen baimenak eta taxi lizentziak, aldiz, %1 igoko dira; estolderia zerbitzuak, aldiz, %5a egingo du gora.
Baita jaitsierak ere
Bestalde, establezimenduak irekitzeko tasa %20a jaistea proposatzen du Udal Gobernuak: «merkataritza eta enpresa txikien jarduera ekonomikoa sustatzeko asmoz», Ogasun zinegotziaren hitzetan. Era berean, 2016-2017 ikasturterako Haur Eskolako jangelaren kuota ere %30a jaistea erabaki dute.
Tasa batzuk, mantenduta
Beste hainbat tasa, aldiz, mantendu egingo dira: ikuskizunetarako sarrerak eta astero jartzen duten azokaren tasak, kiroldegikoak, ur hornidurakoak, baita zerbitzu sozialak ezartzen dituen alojamendu eta jangela sozialaren tasak ere.
Taxien tarifak eta Eskolak Kiroleko laguntzak ere, aztergai
Gaur arratsaldeko 19:00etan bilduko dira udal ordezkariak ohiko Plenoan.
Hilero bezala, gaur bilduko da Udaleko Plenoa ohiko deialdian. Arratsaldeko 19:00etan hasiko da bilkura, eta hainbat gai jorratuko dituzte, tartean 2017ko Ordenantza Fiskala.
Beste hainbat gai, ere bai
Horrez gain, taxi zerbitzuaren tarifen proposamena, Eskola Kiroleko dirulaguntzak eta erraustegiaren ingurumen baimenari Hernaniko Udalak jarritako errekurtsoa ezeztatzen duen ebazpenari ere errekurtsoa jartzea.
Mozioak eta galderak, gero
Bukaeran landuko dituzte, ohi bezala, taldeen mozioak eta galderak. Mozioen artean, besteak beste, landuko dira: Euskara Ari Du ekimenarena, 1936an frankistek fusilatutako pertsonen oroimenezko adierazpena, eta hildako langilearen aldeko adierazpena.