Aurten ere jarri dituzte martxan, Hernaniko Udaleko zerbitzu sozialek, adinekoei zuzendutako bi tailer: memoria eta estimulazioa lantzeko tailerrak, hain zuzen ere. Psikologoak bideratzen du talde bakoitza, eta astelehen, astearte, asteazken eta ostegunetan ematen dira saioak.
Interesatuek, bi aukera
Interesa duten guztiak, harremanetan jarri daitezke zerbitzu sozialetan, 943 55 78 54 telefonora deituta, edota jubilatuen etxeko juntakideekin.
Memoria lantzeko, lanak saioetan eta etxean
Memoria lantzeko taldean, helburuak izango dira oroimena ezagutzea, bere funtzionamendua hobetzea, oroimena errazteko amarru batzuk ikastea, eta galera eta gaixotasunak prebenitzea.
Horretarako, ariketa erraz eta atseginak egingo dituzte, baina ez bakarrik tailerrean; saioen artean ere praktikatuko dute, eta eguneroko bizitzan erabilgarriak eta beharrezkoak diren oroitzapenak sendotzeko amarruak ikasi.
Estimulazio tailerra, depresio eta antsietate arazoak lantzeko
Estimulazio tailerrean, berriz, landuko dituzte depresio eta antsietate sintomak edota arazoak. Antolatuko dituzte zenbait aktibitate eta solasaldi, bakardadeari, tristurari eta urduritasunari aurre egiteko.
Asmoa da, besteekin harremanetan jartzea, denbora eta esperientziak konpartitzea, aisialdiaz elkarrekin gozatzea...
Taldeko kideek aukeratutako ekintza atseginak eta errazak ere egingo dituzte.