Euskerazko abestiak, afrikarrak, ingelesak, italiarrak... Mota guztietakoak eta mundu osokoak izango dira, gaur Milagrosan entzungo diren kantuak. Barietate haundiko kontzertua eskainiko dute Hernaniko Kantuz abesbatzak eta Donostiako Ekintzak, iluntzeko 20:00etan hasita.
Guztira, 17 abesti izango dira; eta horietako bi, elkarrekin kantatuko dituzte bi abesbatzek: Tourdion, Pierre Attaignantena; eta Goizian argi hastian, Les Bordesena.
Kantuzek, sei abesti
Horietaz aparte, Kantuzek sei abesti eskainiko dizkie entzuleei, Igor Arroyoren zuzendaritzapean: Hymn a la nuit, Bihotz bat, Esta tierra, Nahi zuya yin, Signore delle Cime eta The lion sleeps tonight.
Ekintzak, bere aldetik, bederatzi abesti kantatuko ditu, Marina Lertxundik zuzenduta: Ipharadisi, Teresica Hermana, Ume eder bat, Lascia ch’io pianga, A ti, Ilunabarra, I’m gonna sing, Maite eta The Lord bless you.
Berez, apirilaren 30ean zen egiteko kontzertua, baina bertan behera geratu zen, eta gaur egingo dute. Herritar guztiak gonbidatu ditu Kantuzek, «bertaratu eta une atsegin bat pasatzera».