Hernaniar eta astigartar guztiak deitu ditu BagaGiltza herri plataformak, bihar eguerdian: erabakitzeko eskubidearen alde, argazki erraldoia aterako dute. 13:15etan izango da, Hernaniko apeaderoko eskaileretan: «zatoz, ekimenaren irudia izango den argazki erraldoi baten parte izatera!», animatu dituzte.
Datorren urteko martxoan egin nahi dute galdeketa, eta horri begira, beste bi zita ere jarri ditu BagaGiltzak. Urriaren 29an, beste batzar bat egingo dute, lanean jarraitu, hurrengo pausuak markatu, eta erabakiak hartzeko. Eta azaroaren 12an, Udaberri Festa ospatuko dute Hernanin; udazkenean izanda ere, izen berdinarekin egingo dute.
«Zatoz, ekimenaren irudia izango den argazki erraldoi baten parte izatera!», luzatu dute deia.
Urteberriko Sarirako boletoak, salgai
Gure Esku Dagok, bere aldetik, Urteberriko Saria zozketa abiatu du, eta parte hartzeko boletoak, salgai daude 5 euroan, Hernaniko hainbat denda eta tabernatan.
Sari potoloena, 30.000 eurokoa izango da; eta beste 10 sari ere zozketatuko dituzte, bakoitza 1.000 eurokoa. Zozketa urtarrilaren 16an egingo dute, eta otsailaren 18an banatuko dituzte sariak, Beasaingo Igartza jauregian.