Hiru eskultura eta hamalau pintura, Siriako errefuxiatuei laguntzeko. Desiria erakusketa jarri du Peio Villalba artista hernaniarrak Biterin, eta urriaren 27ra arte dago ikusgai, astelehenetik ostiralera, arratsaldeko 18:00etatik 20:00etara.
Lanetan isladatu du Villalbak, errefuxiatuek bizi duten drama, arriskua, bakardadea, beldurra, tristura eta heriotza, intentsitate haundiarekin.
Lanekin bildutako dirua, #PortabebésparaSiria erakundearentzat
Ikusgai bakarrik ez, salgai ere egongo dira lanak, eta bildutako dirua, #PortabebésparaSiria erakundearentzat izango da. Donostian sortu zen, Siriara ume-eramaileak bidaltzeko helburuarekin, eta 3.000 ume-eramaile bildu zituzten, Estatuko 120 puntutan; tartean, Hernaniko Kuluska dendan.
Orain, beste hainbat ekintzatan ari da lanean erakundea, Siriako gerraren biktimei laguntzeko asmoz; besteak beste, Atenaseko Hotel City Plazaren proiektuan laguntzen, edota erakundeko boluntarioek, Grezian egon diren epean, bertan ezagutu dituzten familiei babesa ematen.