Lanean da berriro, Hernaniko Hezkuntza Plataforma, eta gaur bertan emango diote hasiera, ikasturte berriari. Aurreneko hezkuntza eskola egingo dute, udaletxeko areto nagusian, arratsaldeko 19:00etan.
Estreinako saio honetan, Konpetentzia digitala eta XXI. mendeko hezkuntza izango da aztergaia. Mugikorrak, ordenagailuak, tabletak, sare sozialak, internet... izango dituzte hizpide, hain zuzen ere.
Maite Goñi irakaslea, konpetentzia digitalean aditua, bertan
Landuko dute, besteak beste, zein den seme-alabei mugikorra erosteko adin egokia, zein tresna komeni diren etxerako, sare sozialetan ibiltzeko mugarik jarri behar ote zaien...
Eta baita ere, irakaslegoa prestatuta ote dagoen, gailu digitalak erabiltzeko. Hain zuzen ere, irakasle bat egongo da bertan, Maite Goñi, Ordiziako Jakintza ikastolakoa eta Mondragon Unibertsitatekoa. Hezkuntza arloko konpetentzia digitaletan aditua da Goñi, eta berak argituko ditu bertaratzen diren guztien zalantzak, eta kezkak.
Izan ere, kezkak ere hamaika izaten dira, internetez eta sare sozialetaz ari garela: nola babestu geure burua? Modurik badago, edo dena agerian gelditzen da? Ezustekoren bat badugu, nola konpondu dezakegu?
Zalantza horiek guztiak argitzeko, saiora azaldu besterik ez dute, interesa dutenek. Denak animatu dituzte bertaratzera, izan guraso, gazte, nerabe edo irakasle.