UDALEKO Berdintasun Kontseiluak egitasmo berria jarri du martxan: Mapa morea. Ordutebete inguruko aurkezpena egingo dute gaur, 18:00etan hasita, kultur etxean.
Mapa morearekin lortu nahi dute, herria genero ikuspegitik aztertzea. Prozesu partehartzailea egingo dute horretarako, gaur bertan hasiko dena. Prozesu honetan hiru gai landuko dituzte: aurkezpena bera; hirigintza eta generoa; eta Mapa morea egiteko pausuak.
Mapa morea herritarrek egingo dute, herritarrentzat; hala azaldu dute Udaletik. Lana osatzeko lau ardatz hartuko dituzte kontuan: segurtasuna eta autonomia; mugikortasuna eta irisgarritasuna; emakumeen presentzia erreal eta sinbolikoa espazio publikoetan; eta zaintza, lan ugalkorra eta eguneroko bizitzarako espazio eta ekipamendu publikoen sarea. Udaletik herritarrak gonbidatu dituzte aurkezpenera; haurtzaindegi zerbitzua izango da.