Urumea Berrin 80 etxebizitzako blokea hasi dira eraikitzen, eta EH Bilduk Kronikara bidali duen prentsa oharrean dionez «Udalaren obra baimenik gabe» hasi dira lanak. Era berean, oharrean gogoratu dute «obra baimena Tokiko Gobernu Batzordeak eman behar» duela.
«Obra lanak geldiarazteko eskaera luzatu dugu»
Udal taldeak azaldu duenez, aurreko hastean hasi zituzten lanak, baimenik gabe: «horregatik eta Udalaren paralisia kontuan izanda, EH Bilduk eskatu du obra-lanak gelditzeko. Onartezina da baimenik gabe obra haundi bat egitea».
Oharrean azaldu dutenez, horrelako kasuetan prozesua ondorengoa izaten da: «eraikin berri bat egiteko obra Tokiko Gobernu Batzordeak onartu behar du eta normalean, lehenago Hirigintza Batzordetik pasa ohi da. Oraingoan, aldiz, ez da inon ere onartu, baina obra-lanak hasiak dira».
Era berean, gehitu nahi izan dute: «udal arkitektoaren aldeko txostena egonda ere, prozedura administratiboa ez da bete, eta gaur gaurkoz, ez dago baimenik eraikin hori egiteko».
Gelditzeko eskera, aurkeztuta
Hori ikusita, asteartean aurkeztu zuten obra gelditzeko eskaera: «oso larria iruditzen zaigu gertatu dena. Zer gertatuko litzateke baimenik gabeko obran lan-istripu bat gertatuko balitz?».
«Noiz jardungo dira astigartarron alde lanean?»
Horrez gain, salatu dute: «beste behin, gertaera honek agerian uzten du Udal Gobernu talde honen utzikeria eta arduragabekeria». Eta galdera luzatzen dute: «noiz jardungo dira astigarragarron alde lanean?».