2019an pasako dira Hernaniko zaharren egoitza eta eguneko zentroa, Gipuzkoako Foru Aldundiaren esku egotera. Kabia foru erakundea sortu dute horretarako, eta bere gain hartuko ditu Gipuzkoako 16 egoitza. Udaletatik erakundera trantsizioa egiteko, plangintza bat prestatu dute, eta Hernanikoak izango dira azkenekoak, 2019ko bigarren seihilekoan.
«Aspalditik datorren gaia da», azaldu du Luis Intxauspe alkateak: «1999-2003 legegintzaldian, Legebiltzarrak definitu zuen zein konpetentzia diren Aldundienak eta zein Udalenak, menpekotasuna duten pertsonen gaietan. Eta zehaztu zuen, zaharren egoitzak eta eguneko zentroak Aldundien eskumena izango direla».
Horretarako, Kabia sortu zuen Gipuzkoako Foru Aldundiak, aurreko legegintzaldian, eta plangintza osatu zuen, trantsizioak egiteko. Horren arabera, 2018an pasako ziren Hernaniko bi zentroak, Aldundiaren eskuetara. Baina legegintzaldi aldaketarekin, plana bertan behera geratu zen, eta bederatzi hilabeteko epean aztertu dute gaia. Horrela, aurreko astean aurkeztu zuten plangintza berria: 2019an egingo dute trantsizioa, Hernaniko zentroek.
Erabiltzaileen familiak eta bertako langileak, kezkatuta
Aldaketa horren aurrean, bere kezka erakutsi diote Hernaniko Udalari, zaharren egoitzaren eta eguneko zentroaren erabiltzaileen familiek, zerbitzua zer nolakoa izango den orain; eta baita bi zentroetako langileek ere, beraiekin zer gertatuko ote den.
Xabier Lertxundik, Ongintza patronatuko lehendakariak, argitu du ez dela izango «txurian sinatuko dugun txeke bat, ez zerbitzuaren aldetik, eta ezta langileen baldintzetan ere. Hemendik trantsizioa gertatu arte, lanean jarraituko dugu, eta beste egoitzen integrazioak nola ematen diren aztertuko dugu, gurea ahalik eta modu onenean egiteko».
«Gustatuko litzaiguke egoitzek bere izaera mantentzea»
Izan ere, negoziazio prozesu batean murgilduko da Udala, Kabia erakundearekin: «bederatzi hilabeteko prozesu horretan, oso gainean egon gara, politikoki eta teknikoki. Hernaniko Udalean, lehentasun bat izan dira egoitzak urte hauetan, aurrekontu aldetik eta zerbitzuen kalitatearen aldetik, eta ez dugu utziko traspaso honekin kalitatean beherakadarik egoten. Herrian oso txertatuta dagoen egoitza da, pisu haundia daukana, eta gustatuko litzaiguke izaera hori mantentzea».
Eta berdin langileei dagokienean: «Hernaniko egoitzetan, funtzionarioek daukaten egoera ona da, eta bermatuko dugu etorkizunean berdin jarraitzea. Horretarako, bildu gara Udaleko komitearekin, Gizarte Zerbitzuen komitearekin eta udal teknikariekin, langileen kezkak jaso eta Aldundiarekin sinatuko dugun hitzarmenean argi eta garbi isladatzeko, langileek eskatzen dituzten baldintzak».
«Urtebete beranduago sartzeak, kostu bat suposatuko dio Udalari»
Plangintza aldatzeak, Udalari eragiten diola azaldu du Lertxundik: «urtean 850.000 euro bideratzen ditugu horretara, eta urtebete beranduago sartzeak, kostu bat suposatuko dio Udalari, Aldundiarena den eskumen batean. Maite Peña diputatuak azaldu zigun, dirulaguntza bat izango zela, baina inola ere ez gastu osoa kubritzeko. Beraiekin bilduko gara horri irtenbide bat bilatzeko».
Izan ere, horrek suposatzen du, Udalaren eskumena diren zerbitzuetan, muga batzuk izatea, eta ezin inbertitzea behar bezainbeste: «lehenago sartu edo ez, kriterio teknikoen arabera proposatu dute, Hernanikoa konplikatuena delako, langileen egoera eta egoiliarren kopurua kontutan hartuta. Baina ekonomikoki, kalte bat suposatzen digu urtebete atzeratzeak, eta horrek ordain bat behar du».
Gaur egun, 60 lagunentzat dago tokia eguneko zentroan, eta beste 114 lagunentzat, zaharren egoitzan. Eta langileei dagokienez, 120 dira aldaketa honek eragingo dienak.