Beste pauso bat eman zuen Astigarragako Udalak, aurreko larunbatean, hondakinen bilketa sistema berria ezartzeko; edukiontzien sistema, alegia.
Izan ere, plenoak onartu egin zuen San Marko Mankomunitatearekin lankidetza hitzarmena sinatzea, hondakinen bilketaren inguruan. Alde bozkatu zuten EAJko bost zinegotziek (bat falta zen plenoan) eta PSE-EEkoak, eta kontra EH Bilduko zinegotziek.
EH Bilduren bi mozio aztertzeko eskaera, baztertuta
Plenoko gai ordenari heldu aurretik, Andoni Gartzia EH Bilduko bozeramaileak hartu zuen hitza, eskatzeko plenoan beste bi puntu lantzea: «bi mozio dauzkagu aurkeztuta, eta bigarren saiakera egingo dugu plenora ekartzeko. Ez zaigu normala iruditzen, azarora arte itxaron behar izatea».
Eskaera ez zen onartu, EAJ eta PSE-EEren kontrako botoekin, eta EH Bilduren aldekoekin; eta bi mozioak ez ziren gai ordenean txertatu.
Aldaketa bat, hitzarmena sinatzea onartu aurretik
Gai ordeneko puntuei ekin zieten segidan, eta aurreko plenoko akta onartu ondoren, hondakinen bilketarako hitzarmenari heldu zioten. Bozkatu zuten, Astigarragako Udalaren eta San Marko Mankomunitatearen arteko lankidetza hitzarmena onartzea, alkateari hitzarmen hori sinatzeko baimena ematea, eta Garbitaniaren alde egindako kudeaketa gomendioa berreskuratzea.
Puntu horretan, testuak honela zioen: Zerbitzu berria kontratatzerakoan, gaur egun Garbitania SL enpresarentzat Astigarragako zerbitzua egiten duten langileen subrogazioa eskubidea bermatuko da, araudi juridikoek diotenarekin bat. Horretarako, Astigarragako Udalak horren inguruko informazio zehatza emango dio San Marko Mankomunitateari.
Udal idazkariak eskatu zuen, (...)langileen balizko subrogazio eskubidea(...) jartzea, eta plenoak eztabaidatu ondoren, erabaki zuen balizko eta legezko hitzak txertatzea puntu horretan. Aldaketa horiekin onartu zen hitzarmena.
Udalak eta San Markoren arteko hitzarmena onartu zuen plenoak, eta alkateari hori sinatzeko baimena ematea, Udal idazkariak proposatu zuen aldaketa bat txertatuta.
«Onartuko dugu herriaren erabakia, baina hau ez da aldaketa egiteko modua»
EH Bilduk kontra bozkatu zuen, eta Gartziak azaldu zuen zergatia: «onartuko dugu bilketa sistema aldatzea, herriaren erabakia delako. Baina hau ez zaigu iruditzen aldaketa egiteko modua». Kritikatu zuen, «zerbitzua pribatizatu» egingo dela, eta hainbat hutsune ikusten dizkiotela hitzarmenari: «pardelak eta errefuxa batera botako dira, eta hori ezingo da kontrolatu. Gainera, hasierakoaren kostu laukoitza jasotzen du hitzarmenak orain. Eta bestalde, dio hilero errebisatuko direla edukiontziak, eta ez astero, hasiera batean bezala. Beraz, edukiontzi bat gaizki badago, horrela pasako du hilabetea, errebisatu arte».
Azkenik, mahai gainean jarri zituen Jesus Mari Santos alkateak prentsan egindako adierazpenak: «esan duzu prozesua oztopatzen ari garela, baina zuek zarete oztopo bakarrak, ez zaretelako antolatzen. Hasieratik esan genizuen uztailerako ezinezkoa zela egotea. Ze oztopo jarri ditu EH Bilduk?».
Alkateak leporatu zion, bozketa guztietan kontra bozkatu izana, eta Gartziak erantzun zion ez dela egia: «gezurretan ari zarete guri erasotuz, esanez guregatik ez dela jarri oraindik».
«Astigarragak ikaragarri irabaziko du aldaketarekin»
Zorione Etxezarraga alkateordeak, bere aldetik, nabarmendu zuen hasierako gastua berreskuratu egingo dela gero: «askoz ere merkeagoa da edukiontzien sistema, baina ekonomikoa ez da indargune bakarra. Lortu nahi dugu, ahalik eta birziklapen tasa haundiena».
Horregatik, adierazi zuen aldaketak mesede egingo diola herriari: «Astigarragak ikaragarri irabaziko du aldaketarekin. Eta bereziki zainduko dugu errefuxaren kopurua ahalik eta txikiena izatea, eta birziklapen tasa haundiena».
Ohiko plenoak hilero egiteko eskaera, EH Bilduk
Plenoko hirugarren puntuan, aho batez onartu zuten Txalaka-Oialumeko lehenengo partzelako xehetasun azterlana. Eta ondoren, galderen puntuari heldu zioten.
Andoni Gartziak hartu zuen hitza, hainbat kontu aipatzeko. Aurrena, eskatu zuen plenoen maiztasuna aldatzea, eta hilero egitea aurrerantzean: «orain bi aste egin genuen aurreko plenoa, eta legegintzaldi honetan, ezohiko pleno gehiago egin ditugu, ohikoak baino. Berriro eskatzen dugu, ohiko plenoak hilero izatea. Hasieratik esan genuen, bi hilabetean behin egitea gutxi zela».
Gartziak berak, kritikatu zuen Mugikortasun Astean ekintzarik ez antolatu izana: «esan zenuten egingo zela, baina azkenean ezer ere ez».
Etxezarragak erantzun zion, Herri Eskolarekin hitz egin zutela, elkarlanean ekintza bat antolatzeko asmotan zebiltzalako; baina azkenean atzeratu egin zuten, denbora faltagatik (asteazken honetan egin ziren, kirol egokituaren sentsibilizazio jardunaldiak). Nerea Zusberro zinegotziak gaineratu zuen, behin ekintza hori atzeratuta, hobe zela beste data batean ondo egitea.
Eta aurrekontu partehartzaileei ere egin zien erreferentzia Gartziak, adieraziz ez zutela ulertzen «zergatik ez zen sartu Sagardo Plaza birmoldatzeko proposamenaren papera aukeren artean, bost aldiz proposatu bazen».