Beste urte batez, aurten ere, liburutegi eta ludoteka zerbitzua eskainiko du Goxalik ikasturtean zehar. Atzo ireki zituen ateak, eta astelehen eta ostiralero eskainiko du zerbitzua Haur, Lehen eta Derrigorrezko Bigarren Hezkuntzako haur eta gazteentzat. Zerbitzu hori borobiltzeko, gainera, bertan izanen dira Larraitz Salaberria eta Aizpea Huizi hezitzaileak, bertaratzen direnei laguntzeko prest beti.
Asteleheneko ordutegia aurreratu egin dute: 16:45etan dute zita Haur Hezkuntzakoek, eta 17:45etan, Lehen Hezkuntzakoek.
Aldaketa eta berrikuntzak
Aurreko urteetan bezalaxe, astelehen eta ostiraletan irekiko ditu ateak Goxalik, baina aurten, aldaketa txiki bat izango da astelehenetako ordutegian: 16:45etatik 17:45etara, Haur Hezkuntzako haurrak izanen dira; eta 17:45etatik 18:45etara, Lehen Hezkuntzakoak.
Bestalde, ostiraletan ohiko ordutegia mantenduko dute LH 5garren mailatik DBH 2garren maila bitartekoentzat: 17:00etan, liburutegi zerbitzua eskainiko dute, irakurri eta etxerako lanak egiteko, eta 18:00etatik 19:00etara joko tailerrak izanen dira adin bereko gazteentzat.
Aurten gainera, nobedade bat izanen da: arratsaldeko 17:00etan hasten den tartean, etxeko lanak egiteaz gain, ikasteko teknikak irakatsiko dituzte, eskemak, laburpenak eta abar egiten ikasiko dute.