Finalaren ateetan dira Antton Apezetxea eta Iker Salaberria goizuetarrak, Nafarroako Txapelketan. Apezetxeak Lergari irabazi zion Donezteben (18-2), eta gaur jokatuko du kadete mailako semifinala, Gamboaren kontra, 10:00etan Labriten. Salaberriak, bere aldetik, beste herritar bat menderatu zuen Goizuetan bertan, Aitor Aizkorbe (18-4); eta bihar izanen du semifinala, gazte mailakoa, Unai Mataren kontra, 10:00etan Labriten.
Adarragan finala gaur, Iker Salaberriak
Final bat ere izango du jokoan Salaberriak, gaur, Logroñoko Adarragan. Pedro Ruiz errioxarrarekin ariko da, Anso eta Ceceagaren kontra, 10:00etan. Semifinaletan, 22-14 irabazi zieten Zubizarreta eta Irazustabarrenari.
Eta Salaberriak berak, Huarteko lau t’erdikoan jokatu zuen asteazkenean. Baita irabazi ere, Plazaren kontra (22-6).
Bi partidu gehiago izanen dituzte pilotari goizuetarrek, gaur: Elizondon ariko da Beñat Apezetxea, Oihan Etxeberriarekin, Retegi eta Maizaren kontra, 09:30etan. Eta Gartzaronen Aitor Aizkorbe eta Antton Apezetzea, Salaberria eta Insausti hernaniarren kontra, 16:00etan.