Hainbat ekimen izango dira Astigarragan herritarrak euskeraz hitz egitera animatzeko helburuarekin.
Horietako bi aurkeztuko dira datorren astean: Gurasolagun eta Mintzalagun. Euskera ikasten ari diren astigartarrak, eta euskeraz badakitenak elkartu eta euskeraz hitz egiteko egitasmoak, biak.
Gurasolagun, asteazkenean
Datorren asteazkenean bertan egingo da aurreneko ekimeneko aurkezpena, Gurasolagunena, alegia. Arratsaldeko 16:30etan egingo dute Herri Eskolako aretoan, eta bertan azalduko dira alde batetik, Gurasolagun ludoteka, eta bestetik, Gurasolagun tailerra. Biak doan izango dira; gurasoekin batera haurrak ere egongo dira, eta baldintza bakarra izango da euskeraz hitz egitea.
Mintzalagun, bi zitetan
Bestalde, bada beste egitasmo bat AEK euskaltegiak eskaintzen duena. Mintzalagun da hori, eta horren inguruan informazio gehiago jaso nahi duenak, egingo dituzten bi bileretako batera joatea besterik ez du: bata, asteazkenean izango da, goizeko 09:30etan; eta bestea, ostegunean, arratsaldeko 18:30etan.
‘Ehun eta ehun... berrehun ordu euskaraz’, erronka
Bukatzeko, egitasmo berri bat aurkeztu zuten herriko hainbat taldek joan den astean: Ehun eta ehun... berrehun ordu euskaraz.
Euskeraren egunera begira, azaroaren 26tik abenduaren 3ra, astebetez euskera hutsean bizitzeko esperientzia pertsonala gauzatzeko ekimena izango da. Urriaren 28ra arte eman beharko da izena eta bi aukera izango dira: hiztuna izatea, astebetez euskeraz biziko dena; edo hizkidea, hiztunei euskeraz bizitzen lagunduko diena. Izena eman nahi duenak, idatzi: astigarraganeuskaraz@gmail.com.