Lan txukuna egin du 25 urtez Xaguxar Aisialdi Taldeak Astigarragan, eta hori ospatzeko, hainbat ekintza egingo dituzte. Horietako bat gaur egingo dute, arratsaldeko 17:30etatik aurrera: familia arteko ginkana, hain zuzen.
6 lagunez osatutako taldeak
Xaguxarrek antolatutako ekintzan taldeka parte hartuko dute herritarrek: 6 kideko taldeak izango dira, 2 heldu eta 4 haurrez osatutakoak.
Momentuan, ekintza hasi baino lehen, eman beharko dute izena talde partehartzaileek. Eta ondoren, hasiko da ginkana, arratsaldeko 17:30etan. Joseba Barandiaran plazatik abiatuta, herrian ibiliko dira ‘xaguxarrak’ proba desberdinak egin eta familia artean ondo pasatzen.
Urteurren Jaia, gaur zortzi
Urriko ekitaldi haundia, aldiz, datorren larunbatean, gaur zortzi, egingo den Urteurren Jaia izango da. Orduan, Foru Plazan izango da zita, eta goizetik arratsaldera arte luzatuko da festa.
Goizeko 11:00etan emango diote hasiera jaiari plazan bertan jarriko diren puzgarri, ohe elastiko eta jumingaren irekierarekin. Ondoren, 14:00etan, bazkaria egingo dute denak batera, Xaguxarreko iraganak eta etorkizunak, haur, gazte eta gurasoek.
Bazkalostean berriz ere irekiko dituzte puzgarriak 15:30etan, eta arratsaldeko 18:00etan, dantzaldia hasiko da, DJonekin.
Kamixetak eta txartelak, salgai
Urteurreneko Jaiaren bueltan egingo den bazkariko txartelak salgai jarri dituzte Ikatza eta Astiarra tabernetan, baita kiroldegiko harreran ere, asteazkenera arte. Bestalde, kamixetak ere salgai daude, 10 euroan. Horiek eskuratzeko aukera izango da gaur arratsaldeko ginkanan, baita datorren larunbateko jaian ere.