Gero eta gehiago dira, mendian korrika egitera animatzen direnak; eta gero eta gehiago dira mendiko lasterketak ere. Eta ikusita mendi lasterketa talderik ez zegoela Hernanin, zenbait korrikalari elkartu ziren ekainean, proiektua martxan jartzeko.
Proiektu horrek Axeriak Mendi Lasterketa Taldea izena hartu du orain, eta taldea sortzeko prozesuan dabiltza, Hernaniko eta inguruko hainbat lagun: «28 gara orain, 19 mutil eta 9 neska, herri askotakoak. Izan ere, Hernanikoak bakarrik ez, Donostia, Lasarte, Urnieta, Iruña eta Burgosekoak ere badaude, besteak beste», azaldu dute taldetik.
Adin eta gaitasun guztietako korrikalariei irekia
Nabarmendu dute, gainera, adin eta gaitasun guztietako korrikalariei irekita dagoela. Behar den bakarra, mendian korrika egin nahi izatea!
«Helburua da esperientziak partekatzea, elkarrekin entrenatzea, lasterketetara elkarrekin joatea, kedadak egitea beste talde batzuekin...», diote.
Orain arte, bi bilera egin dituzte, taldeko kideek. Eta gainerakoan, whatsappeko talde baten bitartez ari dira lanean eta harremanetan.
Interesa dutenek, nahikoa dute mezu bat bidaltzea, izen-abizenak eta telefonoa jakinaraziz, Axeriak Mendi Lasterketa Taldearen Facebookera, edo hernanintrail@gmail.com helbide elektronikora.
Kedada irekia ere antolatuko dute laster, nahi duten guztientzat, mendi buelta bat egiteko.
Taldeko logoa, prest
Taldearen izena aukeratu zuten aurreneko bileran, eta dagoeneko osatu dute taldeko logoa ere: axeri bat, eta Onddi eta Adarra mendiak irudikatzen ditu. Eta orain, taldearen ekipazioarekin ari dira lanean: diseinua aukeratu, zein material prestatu...
Kedada irekia, laster
Gainera, kedada irekia ere antolatuko dute laster, mendi buelta bat egiteko, nahi duten guztientzat. Printzipioz, azaroan izango da, jakinaraziko dute eguna. Eta helburua izango da, elkar ezagutu eta jendea taldera gerturatzea.