Hilaren hasieran Hernaniko Institutua salatuko zuela iragarri zuen Covitek (Colectivo de Victimas del Terrorismo), «Gudarien Egunaren bueltan Institutuko 50 adin txikikok ETAko 22 kide omendu zituztelako institutuko instalazioetan».
Aste honetan, berriz, irakasleak ere ikertzeko eskatu du elkarteak, «delituaren eragile» izan daitezkeelakoan.
Irakasleak, «eragile»
Covitek argitaratutako prentsa oharrean azaldu du «ikasleak Audientzia Nazionalaren aurrean deklaratzera deitzeko» eskatu duela.
Era berean, beste eskaera baten berri ere eman du: «ikertu dadila institutuko arduradun eta irakasleen erantzukizun penala, delituaren eragile gisa».
Hezkuntza Sailak, «barrutik landuko du gertatutakoa»
Honen harira, Kronika Eusko Jaurlaritzako Hezkuntza Sailarekin jarri zen harremanetan atzo. «Guk hezkuntza alorrean egiten dugu lan, eta ikastetxean gertatutakoa barrutik landuko da. Bake eta bizikidetza idazkaritzarekin elkarlanean, ikasleekin landu beharko dira biktimekiko enpatia, giza eskubideak... Ez dakigu Coviteren eskaerarekin zer gertatuko den. Gu hezkuntzara mugatuko gara».