Zazpi lagun elkartzen hasi ziren lehengo urteko udaran, aisialdi talde bat sortzeko asmoz: Ainitze Kalonje, Leire Fernandez, Jon Zumalabe, Izaro eta Maialen Auzmendi, Ashok Iturriza eta Egoitz Arbiol. «Gure asmoa da haur eta gazteekin Hernanin aisialdi alternatibo bat sortzea, gure bidez, baina beraiek antolatua. Gu haien bidelagun izango gara, baina ez dugu guk ezer zehaztuko».
Larunbat honetan egingo dute Kanika Aisialdi Taldearen sorrera festa, 16:30etan hasita, Ave Marian, eta 6 urtetatik hasi eta 18 urtera arteko hernaniar guztiak gonbidatu dituzte.
Haurretatik, hezitzaileetara
Ia ez dute jarri adin mugarik, parte hartu ahal izateko. Larunbateko festara gerturatzen denari nahi adina informazio emango diote, eta parte hartzeko aukera zabaldu. «Sei urtetik gorakoentzako da, baina badakigu 16-18 urte arteko tartea inflexio puntu izaten dela. Norberak emango dio etapa honi bukaera, baina asmoa da Kanikan ume moduan hasten direnak hezitzaile izatera iristea.
Boterea eman
Era berean, herrira begira egindako proposamena dela zehaztu dute. «Bilatzen duguna da haurrek bere aisialdia antolatzea; beraiei eman nahi diegu boterea. Ikasi dezatela parte hartzen, herriari begira. Konturatu daitezela beraiek ere herria osatzen dutela, eta parte hartzeko lekua dutela».
Jolasak, ipuinak, musika...
Taldea ezagutzera eman eta herritarrak parte hartzera animatzeko, festa antolatu dute larunbatean, eta adin tarte guztietarako ekitaldiak antolatu dituzte: jolasen zirkuitua, ipuin kontalaria, kontzertuak, txosna...