25 urte bete ditu aurten Xaguxar Aisialdi Taldeak, eta hori ospatzeko, bi ekintza berezi antolatu ditu urriko bi larunbatetan. Aurrenekoa larunbat honetan izango da, familia arteko ginkana egingo dute; bestea, datorren larunbatekoa, izango da urteurreneko festa haundia.
Larunbateko zita, Joseba Barandiaran plazan
Lehenengo ekintza, larunbat honetakoa, izango da ginkana familiarra. Arratsaldeko 17:30etatik aurrera, Joseba Barandiaran plazan jarri dute zita. Eta bertatik abiatuz hainbat proba egin beharko dituzte herrian zehar. Horretarako, sei laguneko taldeak osatu beharko dituzte, betiere, bi heldu eta lau haurrez osatutakoak. Parte hartzeko, larunbatean bertan bertaratzearekin nahikoa izango da.
Datorren astean, Urteurren Jaia
Baina momentu berezienak datorren larunbatean bizituko dituzte Xaguxar taldeko kideek. Orduan egingo dute Urteurren Jaia, egun osoko festa haundia.
Ekintza desberdinez gain, bazkaria antolatu du Xaguxarrek egun horretarako, adin guztietako lagunentzat. Bertan bazkaltzeko txartela besterik ez da beharko. Salgai egongo dira Ikatzan, Astiarran eta Kiroldegian: haurrek, 10 euro; helduek, 15.