Sentsazio gazi-gozoekin hasi zuten asteburua Mundarroko mutilek. Jaieguna zela aprobetxatuz, ostiralean izan zuten zita mutilen erregional mailako bi taldeek.
Trintxerpera egin zuten txangoa Gorengo mailakoek, eta esku hutsik bueltatu ziren etxera, 1-0 galduta. Bigarren taldeak, Erregionaletako 1go mailan jokatzen duenak, 3-2 irabazi zuen Donostiako Asoleus taldearen aurka.
Baloiaren jabetza bai, baina golik gabe
Hasiera kaxkarra izan zuten Gorengo mailako moreek, bigarren jokaldian gola sartu baitzuten aurkariek, Trintxerpeko mutilek. Baina hori izan zen norgehiagokako gol bakarra.
Hortik aurrera, segituan erantzun zuten astigartarrek, eta gola sartzera joan ziren hauek ere, baina ez zuten lortu: Beñatek gola sartu eta momentuan deuseztatu zuen arbitroak, linearrak hala adierazita.
Dena den, bere alde zuen partidua Mundarrok. Gehienetan, baloi altuetan nagusitzen ziren Oier eta Beñat; besteetan, berriz, erreboteak irabazten zituzten moreek. Baina ez zuten golik sartzea lortzen, nahiz eta aukerarik ez zitzaien faltatu.
Hala joan ziren atsedenera, eta bueltan, bigarren zatia nahiko parekoa izan zen: Trintxerpek kontraerasoa bilatu zuen, baina moreek izan zuten baloiaren jabetza, nagusiki. Punteria okerragatik, batzuetan, eta arbitroaren erabakiengatik, besteetan, ezin izan zuten punturik etxeratu.
Etxetik kanpo, hurrengo zitak
Zarkumendegitik kanpo jokatuko dute asteburu honetako jardunaldia Mundarroko aurreneko bi taldeek. Zubietan jokatuko dute Gorengo mailakoek Deustoren aurka; eta Usurbilen izango dira, Erregional lehenengo mailako mutilak.