Festarik festa dabil Ereñotzu, Udazken Kulturalean bete betean sartuta. Umeen Jaia egin zuten aurreko larunbatean, eta bihar, haur zein helduek gozatzeko moduko Auzoko Festa egingo dute, frontoian. Arratsaldeko 17:00etan hasiko da festa, eta iluntzera arte luzatuko da.
Bertako produktuak, baita lehiaketa ere
Bertako produktuak izango dira Auzoko Festaren protagonista haundiak. Frontoia postuz beteko dute, eta bertan saldu ahal izango dira produktuak. Horien artean, Auzo Udalak garrantzia berezia eman nahi izan die auzotarren postuei.
Goizeko 09:30etan jarri dute zita gaur, Albaolara joateko.
Horrez gain, sagardoa ere dastatzeko aukera izango dute bertaratzen direnek, baita negu honetako aurreneko gaztain erreak jateko aukera ere.
Bukatzeko, patata tortilla lehiaketa ere egingo dute. Parte hartu nahi duenak arratsaldean zehar patata tortilla eraman besterik ez du, eta bertako produktuez osatutako saskitxoa irabazteko aukera izango du!
Nahi duen guztiak parte hartu dezake biharko patata tortila lehiaketan.
Albaolara bisita gaur, ereñotzuarrek
Bestalde, Albaolara egingo dute bisita gaur: museoa ikusi, itsasontziz badian barrena ibili eta denek batera bazkalduko dute. Aurrez txartelak erosi dutenek, 09:30etan jarri dute zita irteerarako. Eta handik, kotxez edo trenez abiatuko dira Trintxerpera.
Emanaldia eta afaria, gaur zortzi
Datorren astean ere, ez da ekintzarik faltako. Txirritaren heriotzaren bueltan, Bertso jarri musikatuen emanaldia egingo dute frontoian, arratsaldeko 19:00etan hasita. Bertan, Eñaut Agirrek eta Ereñotzuko musikariek (Imanol Kamio, Txus Aranburu...) Txirritaren bertsoak kantatuko dituzte musikaz lagunduta. Horretarako bereziki hautatutako bertsoak entzungo dira.
Ondoren, afaria izango da frontoian, Basetxerri Elkartearen eskutik. Joan nahi duenarentzat, txartelak Hernaniko Tripontzi tabernan eta Auzo Udalean daude salgai: helduek 25 euro, eta haurrek 12.