Atzo aurkeztu zuten, Koro Etxeberria kultura zinegotziak eta Agurtzane Aizpuru kultura teknikariak, arte-eszenikoen udazkeneko programazioa. Urriaren 1ean eman zitzaion hasiera, umeentzako Oa-huetak antzezlanarekin, eta abenduaren 28ra bitartean aukera zabala izango da: haurrentzako beste lau antzerki, gazte eta helduentzako beste hiru, hiru musika emanaldi eta helduentzako dantza ikuskizun bat, familian egiteko dantza tailerrarekin batean.
Kontzertua, ostiralean
Hasteko, ostiral honetan, gaueko 22:00etan Milagrosan izango da kontzertua: Petti eta Etxeko Uzta. Maiatzean kaleratutako Hotzikarak diskoa aurkeztuko dute. Sarrerak salgai daude dagoeneko, Biterin.
Era berean, urriaren 20an Su izan nahi ikuskizuna izango da, gazte eta helduei zuzendua; arte diziplina bat baino gehiago nahasten dituena. Sarrerak salgai jarri dira, gaur bertan.
Atal berria, eta sorkuntza egonaldiak
Udazkeneko programazio honek bi berrikuntza nagusi dauzkala nabarmendu zuten atzoko aurkezpenean. Batetik, Nahastekak atala jarri dute martxan; atal honen baitan eskainiko den aurreneko ikuskizuna izango da, hain zuzen, Su izan nahi. «Diziplina ezberdinak ikuskizun bakarrean elkartzea da helburua», azaldu zuen Etxeberriak. «Ez da ohikoa, eta horregatik, uste dugu publikoa ere ez dela ohikoa izango. Aukera emango du beste publiko bat erakartzeko; bereziki, gazteak».
Bestalde, sorkuntza egonaldiak Hernanin egiteko aukera zabaldu da aurten. «Herritarrak ikusle izaten dira normalean, baina oraingoan sormen prozesuetan hartu ahal izan dute parte», azaldu zuen Etxeberriak. «Produkzio eta sormen prozesuan parte hartzeko aukera izan du herritar talde batek». Hori izan da, Oa-huetak haur antzerkiaren kasua, eta baita Koadernoa Zuri helduentzako antzerkiarena ere.
Bi erronka
Era berean, bi erronkari aurre egiten saiatu direla ere azaldu zuten. Batetik, «musika estilo desberdinetako kontzertuen bidez, publiko zabalagora iristea», Aizpuruk azaldu bezala. Horrela, Pettiren kontzertua, Milagrosan eta gauez antolatu dute. «Milagrosa gauez probatu nahi izan dugu, rock estiloko kontzertu honekin».
Bestalde, haurrentzako antzerki eskaintza zabaltzen saiatu dira. «Adin tarte desberdinei erantzuten saiatu gara, eta gaztetxoentzat zerbait lortzen saiatu gara, ez baita erraza 10 urtetik gorakoentzat zerbait lortzea», zehaztu zuen Aizpuruk. Zentzu honetan, Go!azen! 3.0 telesailean oinarritutako antzerkia ikusteko aukera izango da, 7-12 urte arteko gaztetxoentzako zuzendua. «Udazkena hostoen erorketarekin lotzen dugu, baina loratua dator, oso programazio erakargarriarekin», aipatu zuen Etxeberriak.
UDAZKENEKO PROGRAMAZIOA
Hernani’n Musik
-Petti eta Etxeko Uzta. Urriaren 14an, 22:00etan Milagrosa kaperan. Sarrerak salgai, 7 eurotan.
-Xarnege. Azaroaren 24an, 20:00etan, Biterin. (Sarrera: 7 euro).
-Neighbor. Maite Larburu hernaniarra eta Josh Cheatham seattledarra. Abenduaren 15ean, 20:00etan, Biterin. (Sarrera: 7 euro).
Gazte eta helduentzako antzerkia
-Su izan nahi. Urriaren 20an, 20:00etan Biterin. Nahastekak atal berriaren barruan; arte diziplina desberdinak nahastuko dituzten ikuskizunak. Sarrerak salgai, 7 eurotan.
-Koadernoa Zuri. Azaroaren 15ean, 20:00etan Biterin. (Sarrera: 7 euro).
-Mami Lebrun. Azaroaren 17an, 20:00etan Biterin. (Sarrera: 7 euro). Bertan hartuko du parte Ainara Ortega aktore eta musikari hernaniarrak.
Dantza ikuskizuna
-Oskara. Kukai dantza konpainia eta Erramun Martikorena, azaroaren 16an, 20:00etan Biterin. (Sarrera: 7 euro).
-Dantza tailerra familian. Kukaiko dantzarien eskutik, azaroaren 9an, 18:00etan, 4-8 urte bitartekoentzako eta gurasoentzeko. Izenematea, azaroaren 2tik 8ra, Biterin.
Haur antzerkia
-Mobydick. Urriaren 29an, 12:00etan Biterin. Sei urtetik gorakoentzat aproposa. (Sarrera: 2,70 euro).
-Max txikia. Azaroaren 19an, Biterin. Bi saio: 11:00etan bat eta 12:15etan bestea. Bat eta lau urte bitartekoentzat aproposa. (Sarrera: 2,70 euro).
-Mari Kixkur eta hiru hartzak. Azaroaren 26an, 12:00etan Biterin. Bost urtetik gorakoentzat aproposa. (Sarrera: 2,70 euro).
-Go!azen 3.0. Abenduaren 28an, 18:00etan Biterin. Zazpi eta hamabi urte artekoentzat aproposa.
Bestelakoak: Santa Zeziliako kontzertuak, Musika Eskolako entzunaldiak...