Udalak argitaratu duen prentsa oharrean azaldu duenez, etxebizitzaren alorra ez dute landu azken urteetan. Hori horrela, Etxebizitza Batzordea martxan jartzea erabaki dute «Udalak sortu du eta hainbat herritarrek hartu dute parte».
«Biztanleria jaitsieraren arrazoietako bat da etxebizitza falta»
Herriko biztanleria jaitsi egin da azken urteetan, eta Udalak dio etxebizitza falta dela arrazoietako bat: «falta baino gehiago, eskaintzan etxebizitzarik ez egotea da arazoa; informazio falta, prezio garestiak...».
Inkesta prestatzen
Azaldu dutenez, gai hau lantzeko asmotan, inkesta bat prestatzen ari dira: «helburua da gai hau, eta bide batez, beste gai batzuk lantzea, Goizuetako etorkizunaren eta beharren inguruan».
Horretarako, etxez etxeko dinamika jarri dute martxan: «urrian hasi eta gehienez abendura arte luzatuko da. Herritarrekin egin nahi diren aurrez aurreko hizketaldi horietan, jendearen prestutasuna eta konfiantza eskatzen dira, batez ere, Udalarentzat eta herritarrentzat oso baliagarriak izango direlako herritarrek ematen dituzten erantzunak».
«Beharrei erantzuten ahaleginduko gara»
Galdeketa guztiak eginda eta ondorioak atera, herritarren beharrei erantzuten ahaleginduko dela azaldu du Udalak. Era berean, jakinarazi dute, herritar guztiei abisatuko zaiela batzordeko kideren batek beraiekin bildu nahi duenean; bitartean lasaitasuna eskatu dute.