44 urte ez dira egunero betetzen, eta Goiz Eguzkiko lagunek badakite hori. Ia mende erdia pasa da Jubilatu Etxeak ateak ireki zituenetik 1972ko urriaren 12an, Maribel Etxeberria Azpiazurena zen eraikina herriko jubilatuen etxe bilakatu zuten udaletxeak eta Ongintza Patronatuak. Inaugurazio ekitaldian, Eusebio Iraola erretore jaunak bedeinkatu zuen egoitza, eta bertan izan ziren, baita ere, Jose Maria Setien Alberro, artean apezpiku laguntzailea zena; Altuna alkatea; eta udaletxeko hainbat ordezkari. Han bertan erabaki zuten Goiz Eguzki jubilatuen etxeko lehen Zuzendaritza Batzordea osatzea. 100 bazkide inguru zituen orduan Goiz Eguzkik; eta egun 2.000 inguru dira; Hernanin gutxi izango dira hainbeste bazkide dituzten talde edo elkarteak.
Ospakizunen astea
Esan bezala, nahikoa motibo badute ospakizunerako, eta horretan ari dira azken egunetan: kontzertua, ikastaroa, zinea, jolasak... izan dira astean zehar. Eta gaurko jarri dute hurrengo zita: Goiz Eguzkiko abesbatzak kontzertua eskainiko du, iluntzeko 19:00etan hasita. Bihar bukatuko dute ospakizun sorta, Goiz Eguzkiko egoitzan baita ere, bazkari eder baten bueltan.